في دربها / لوز .. في شفايفها : زهر
:
في دربها : لوز ..
في شفايفها : زهر
في حضرة الإحتفاء : بها / بي
خمْسَة ْو عِشْرينْ واحْلامها غابة ْ شجر
في أغانيها مطر .. في سوالفها حنين
خمْسَة ْو عِشْرينْ تزرعْ طفولتها زهر
تجمع النّجماتْ شتلاتْ ورد و ياسمين
للبَحَرْ .. للبَحْرْ ترمـي أنُوثتها حَجر
ترجف الْموجاتْ تشهق عطش واشواق.. لين
ما تمر ِبيْدينـها الْـبَحْرْ .. يتنفس حذر
تهدأ الْـموجـاتْ و الرّمْـل يشربها أنين
والشَعر مجنون خصلات من ليل و سهر
ريحْ و ْتمرجح قصب درب لوز و درب تين
ينسدل و الفلّ فتـّح ورا عُروة صـدر
و الذهبْ تعرق ُطيوره قـَهَرْ و ْتغار عين
صدْر ممْـلي ْرخامْ و ْشفايف ْتولـّعْ جمر
خصْر يصرخْ من تعب يطلب ْخيوطه تِلين
قافلـة مـن عِـْطر كلْمـا عبايتها تمر
في طرفها نْجومْ و ْشموس .. و أقمار ٍ تزين
مرّت ْو كل الدّرايـش تشـاورها فخر
مرت و كل السّـكيك امْـتلت بالعاشـقين
كلّ ِسدْر ( الْحيل ) طيّر عصافيره ْو نظر
كلْ شريشه زهّرت كلْ طريق ْو كلّ وين !!
طلّت ْحكاياتْ .. إتعـيد ترتيب القدر
توقض الأسماك فيني شواطي من يقين
تعزف ْبصبحي نغم من نوافير و مطر
تغزل ْفـ عيني وعد من غصون ومن يدين
جاتْ والرّغباتْ تحرق مراكب من صبر
جـاتْ و الأنفاسْ تطفي حرايق متعبين
اجمل الحبّ النّبيل الوفيِّ .. الْمنتظر
أنبـل الحـب الجـميل الرقيق المستكـين
قبلها ما كانْ .. ما كان لأغْصاني عُمُر
بعـدها صار العُمُرْ عُمْر و اوْراقي سنين
:
" طاهـــر"
: